X ta soke tsarin rabon kuɗaɗen shiga, ta ƙaddamar da sabon tsarin biyan masu ƙirƙirar abun ciki
Daga Wakiliya
Kamfanin X ya sanar da dakatar da tsarin Revenue Sharing da yake bai wa masu ƙirƙira damar samun kuɗi daga abubuwan da suke wallafawa a dandalin.
Kamfanin ya ce zai maye gurbin tsarin da sabon shirin Original Content Rewards, wanda zai mayar da hankali wajen bai wa masu ƙirƙirar abubuwan na asali lada.
X ta ce daga ranar Juma’a ba za ta sake karɓar sabbin masu shiga tsarin Revenue Sharing ba, yayin da waɗanda suke cikinsa za su ci gaba da samun kuɗaɗen da suka tara har zuwa 7 ga Satumba, 2026.
Kamfanin ya ce za a biya tsofaffin mahalarta kuɗaɗensu na ƙarshe sau uku, inda za a fara biyan wani kaso a 14 ga Agusta, sannan a sake biya a 28 ga Agusta, yayin da kuɗin da aka samu har zuwa 7 ga Satumba za a biya su kusan 11 ga Satumba.
Daga 8 ga Satumba, masu amfani da suka cika sharuddan za su fara samun damar neman shiga sabon shirin Original Content Rewards.
Waɗanne abubuwa ne za su cancanci samun kuɗi?
A sabon tsarin, X za ta rika biyan masu ƙirƙirar abun bisa adadin qualified impressions, wato kallon abubuwan da suka wallafa daga masu amfani da ke da Premium a shafin Home Timeline.
X ta ce za a yi biyan kuɗaɗen ne duk bayan makonni biyu.
Daga cikin abubuwan da za su iya cancanta akwai bidiyo, rubuce-rubuce, barkwanci, zane-zane, rahotanni, nazari, sharhi da sauran abubuwan da mutum ya ƙirƙira da kansa.
Sai dai kamfanin ya ce sake wallafa abin da wani ya ƙirƙira kawai ba zai isa ba. Za a bukaci mutum ya ƙara nasa bayani, sharhi, nazari, barkwanci ko wata hanya ta sauya wa abin ma'ana.
X ta kuma ce sauye-sauye kaɗan kamar yanke hoto, ƙara filter, iyaka, watermark, sauya saurin bidiyo ko ƙara rubutu kaɗan ba za a ɗauke su a matsayin Original ba.
Waɗanne ne sharuddan shiga shirin?
X ta ce mai son shiga shirin dole ne ya kasance:
- Ya kai shekara 18 ko fiye;
- Yana zaune a ƙasar da shirin yake aiki;
-
Asusunsa yana cikin yanayi mai kyau;
-
Yana da X Premium, Premium+ ko Premium Business;
-
Yana da aƙalla verified followers 500;
-
Ya samu aƙalla 500,000 Home Timeline impressions daga verified users cikin kwanaki 90 da suka gabata.
Kamfanin ya kuma ce masu shiga shirin dole ne su riƙa wallafa abubuwan da suka ƙirƙira da kansu akai-akai.
X ta ce za a iya dakatar da asusun da ya karya ƙa'idojin shirin na ɗan lokaci ko kuma a cire shi gaba ɗaya, gwargwadon girman laifin.
Sabon shirin zai fara biyan kuɗi ga wadanda suka cancanta daga 28 ga Agusta, 2026, yayin da waɗanda suka fito daga tsohon tsarin suka shiga sabon shirin daga 8 ga Satumba za su fara samun biyan kuɗinsu na farko a 25 ga Satumba.
Kamfanin ya ce manufar sabon tsarin ita ce ƙarfafa masu ƙirƙirar abubuwan asali, musamman waɗanda ke kawo sabbin bayanai, ilimi, rahotanni, nishaɗi da ra'ayoyi masu ma'ana a dandalin.
