Yin isasshen barci a ƙarshen mako na iya rage haɗarin kamuwa da cutar hawan jini – Bincike
Daga Wakiliya
Wani sabon bincike ya nuna cewa yin ƙarin barci na awa ɗaya zuwa biyu a ƙarshen mako na iya rage haɗarin kamuwa da cutar hawan jini.
Masana kimiyya sun yi nazarin bayanan mutane 40,727 a Koriya ta Kudu na tsawon shekaru bakwai, daga 2016 zuwa 2023.
Binciken ya gano cewa mutanen da ke ƙara samun barci a ƙarshen mako bayan gajiyar aikin mako, suna da kashi 6 cikin 100 na ƙarancin yiwuwar kamuwa da hawan jini.
Ga mutanen da ba sa yawan motsa jiki, raguwar ta kai kusan kashi 6.9 cikin 100.
Masu binciken sun kuma ce ƙarin barci na kusan awa ɗaya da mintuna 37 a ƙarshen mako na iya rage haɗarin hawan jini da kusan kashi 9 cikin 100.
Me ya sa ƙarin barci zai iya taimakawa?
Masana sun ce hawan jini yakan ragu lokacin da mutum yake barci. Rashin isasshen barci na iya hana wannan faruwa yadda ya kamata, kuma hakan na iya ƙara haɗarin matsalolin zuciya.
Sai dai wani masanin barci, Christopher Depner, ya ce bai kamata a ɗauki sakamakon binciken a matsayin hujjar cewa ƙarin barci kai tsaye ne ke hana hawan jini ba.
Ya ce binciken ya nuna alaƙa ne kawai, ba wai ya tabbatar da cewa ƙarin barcin ne ya haifar da raguwar hawan jinin ba.
Kada a yi barci fiye da kima
Masana sun kuma yi gargadin cewa yin barci mai tsawo sosai a ƙarshen mako na iya rikita tsarin barcin mutum.
Sun ce mafi dacewa shi ne mutum ya samu ƙarin barci na awa ɗaya zuwa biyu kawai, musamman idan bai samu isasshen barci a cikin mako ba.
A shekarar 2024 ma, wani bincike da aka gudanar kan mutane fiye da 90,000 ya nuna cewa waɗanda suka fi samun barcin ramuwa a ƙarshen mako na da kusan kashi 20 cikin 100 na ƙarancin haɗarin kamuwa da cututtukan zuciya.
A takaice, masana sun ce samun isasshen barci na da muhimmanci ga lafiyar zuciya, amma barcin ƙarshen mako bai kamata ya maye gurbin samun isasshen barci a kowace rana ba.
