“Kada a tilasta wa kowa shiga Musulunci, babu tilas a addini” – Sarkin Musulmi
Daga Wakiliya
Sarkin Musulmi, Sultan of Sokoto, Muhammad Sa’ad Abubakar III, ya ce babu wanda ya kamata a tilasta masa shiga addinin Musulunci.
Sultan, wanda kuma shi ne shugaban majalisar koli ta harkokin addinin Musulunci ta Najeriya (NSCIA), ya ce Musulmai su mutunta ‘yanci da haƙƙin mutanen da ke bin sauran addinai.
Ya bayyana hakan ne a wajen babban taron NSCIA da aka gudanar a Masallacin Ƙasa da ke Abuja.
Sultan ya ce: “Ba mu da niyyar tilasta wa kowa shiga Musulunci.”
Ya ƙara da cewa mutane da dama suna shiga Musulunci ne da son ransu, yana mai cewa addinin Musulunci ya koyar da cewa babu tilastawa a addini.
Wannan furucin na Sultan ya zo ne makonni bayan da ya yi kira ga Musulmai da Kiristoci a Najeriya da su daina zagin juna, yana mai cewa haƙurin juna tsakanin mabiya addinai na da muhimmanci wajen samun zaman lafiya.
Ya ce Musulmai da Kiristoci bai kamata su ɗauki kansu a matsayin waɗanda suka fi juna ba, domin dukkan mutane daidai suke a gaban Allah.
