Inverter AC da Non-Inverter AC : Wane irin na’urar sanyaya ɗaki ya fi?
Daga Wakiliya
Akwai nau’o’in na’urorin sanyaya ɗaki, wato air conditioner (AC) daban-daban. Daga cikin muhimman bambance-bambancen da ake samu akwai Inverter AC da kuma Non-Inverter AC.
Babban abin da ya bambanta su shi ne yadda compressor, wato injin da ke taimakawa wajen sanyaya iska, yake aiki.
Ta yaya Non-Inverter AC ke aiki?
A na’urar Non-Inverter, compressor yana aiki da cikakken ƙarfi ne har sai ɗakin ya kai yanayin zafin da aka sa.
Da zarar ɗakin ya yi sanyi yadda ya kamata, compressor ɗin yana kashe kansa.
Idan ɗakin ya sake yin zafi, compressor ɗin zai sake kunnawa da cikakken ƙarfi domin rage zafin.
Wannan tsarin na kunnawa da kashewa yana ci gaba da maimaituwa muddin ana amfani da na’urar.
Ita kuma Inverter AC fa?
A Inverter AC, compressor ba ya aiki da cikakken ƙarfi a kowane lokaci.
Yana iya rage ko ƙara saurin aiki gwargwadon yanayin zafin ɗakin.
Misali, idan ɗakin ya kai yanayin zafin da aka sa, compressor zai rage ƙarfinsa maimakon ya kashe gaba ɗaya. Hakan yana taimakawa wajen kiyaye zafin ɗakin a matakin da ya dace.
Wanne ya fi rage kuɗin wutar lantarki?
A mafi yawan lokuta, Inverter AC na iya amfani da ƙarancin wutar lantarki fiye da Non-Inverter, musamman idan ana amfani da AC na tsawon lokaci.
Saboda compressor ɗin inverter ba ya ci gaba da kunnawa da cikakken ƙarfi sannan ya kashe, hakan na taimakawa wajen rage yawan makamashin da ake amfani da shi.
Amma fa'idar ta fi bayyana ne ga mutanen da suke amfani da AC na tsawon sa'o'i da yawa a rana.
Bambancin hayaniya
Wani babban amfani na Inverter AC shi ne cewa yana da ƙarancin hayaniya.
Da zarar ɗakin ya yi sanyi, compressor yana rage saurin aikinsa, don haka hayaniyar na'urar tana raguwa.
A Non-Inverter kuwa, duk lokacin da compressor ya sake kunnawa, yana fara aiki da cikakken ƙarfi, abin da kan haifar da ƙarin hayaniya.
Wannan na iya zama abin lura musamman a portable AC da window AC, inda compressor yake kusa da inda mutane suke.
Tsawon rayuwar na'ura
Saboda compressor na Inverter AC ba ya ci gaba da kunnawa da kashewa da cikakken ƙarfi, hakan na iya rage masa wahalar aiki.
Saboda haka, idan aka kwatanta na'urori masu irin ingancin kayan da aka yi su da su, compressor na Inverter na iya samun damar ɗaukar lokaci mai tsawo.
Sai dai idan inverter AC ta samu matsala, gyaran na'urorin lantarki da ke cikinta na iya zama mafi tsada saboda tana amfani da ƙarin fasahar lantarki.
Me ya sa Non-Inverter AC har yanzu yake da amfani?
Babban abin da Non-Inverter AC ya fi Inverter shi ne farashin saye.
Sau da yawa, Non-Inverter AC ya fi arha a lokacin saye, don haka zai iya zama zaɓi mai kyau ga wanda yake da ƙarancin kasafin kuɗi ko kuma wanda ba zai yi amfani da AC na tsawon lokaci ba.
Misali, idan mutum yana haya ne kuma bai shirya zama a gidan na tsawon shekaru ba, zai iya ganin sayen Non-Inverter ya fi masa sauƙi.
To, wanne ya kamata mutum ya saya?
Idan kana neman AC da za ta kasance mai ƙarancin hayaniya, mai kiyaye zafin ɗaki yadda ya kamata kuma mai iya rage amfani da wutar lantarki, Inverter AC na iya zama zaɓi mafi kyau, musamman idan kana amfani da ita na tsawon sa'o'i da yawa a rana.
Amma idan farashin saye shi ne babban abin da kake dubawa, ko kuma ba ka cika amfani da AC na dogon lokaci ba, Non-Inverter na iya zama zaɓi mai kyau.
Abu mafi muhimmanci shi ne a tabbatar da cewa an zaɓi AC mai daidai da girman ɗakin. Ko Inverter ce ko Non-Inverter, AC mai girma fiye da abin da ɗakin ke buƙata ba lallai ta kasance mafi inganci ba.
A takaice:
Inverter: Ya fi tsada a farko, amma yana da ƙarancin hayaniya kuma zai iya rage kuɗin wutar lantarki idan ana amfani da shi na dogon lokaci.
Non-Inverter: Ya fi arha wajen saye, amma yana iya amfani da ƙarin wuta kuma yana haifar da sauye-sauyen zafin ɗaki yayin da compressor ke kunnawa da kashewa.
Don haka, zaɓin da ya fi dacewa ya danganta da kasafin kuɗi, tsawon lokacin amfani da AC da kuma girman ɗakin.
