Duka a matsayin horo na iya sa yara su fanɗare su zama mugaye idan sun girma -inji Masana
Daga Wakiliya
Wata masaniyar ilimin halayyar ɗan Adam ta ce amfani da hukunci mai tsauri, musamman duka, wajen ladabtar da yara na iya ƙara yiwuwar sakasu su zama fanɗararru masu kunnen ƙashi a nan gaba.
Dokta Liane Alampay, malamar ilimin halayyar ɗan Adam a Jami'ar Ateneo de Manila da ke Philippines, ta bayyana hakan ne a gaban wani kwamiti na Majalisar Dattawan ƙasar da ke kula da harkokin mata, yara da iyali.
Ta ce binciken da aka gudanar tsawon shekaru a ƙasashe daban-daban bai nuna cewa duka hanya ce mai inganci wajen tarbiyyar yara ba.
Maimakon haka, a cewarta, an gano alaƙa tsakanin tsauraran hanyoyin tarbiyya da yiwuwar yara su ƙara fanɗarewa su lalace yayin da suke girma.
“Ba za a iya cewa abu guda ne ke haifar da lalacewar matasa ba,” in ji ta, tana mai cewa tarbiyyar da yaro ya samu, yanayin gidansa da kuma abubuwan da ya fuskanta duk na iya yin tasiri.
Ci gaban kwakwalwa
Dokta Alampay ta kuma ce yara da matasa har yanzu suna cikin wani mataki na inganta tunani da iya sarrafa motsin zuciyarsu.
Hakan na iya sa su kasa fahimtar illar wasu matakai da suke ɗauka ko kuma su kasa sarrafa fushi yadda ya kamata.
Ta ce saboda haka, horon da ya fi mayar da hankali kan fahimtar kuskure da koyar da yaro abin da ya dace na iya zama mafi amfani fiye da hukuncin da ke jawo tsoro kawai.
A Philippines, Ma'aikatar Jinƙai da Ci gaban Jama'a tana amfani da tsarin da ya fi mayar da hankali kan gyara da sake shigar da yara da suka yi laifi cikin al'umma.
Wannan tsarin ya fi duba ci gaban yaro da gyara halayensa, maimakon dogaro da hukunci kawai.
Tsohuwar al'ada
A wurare da dama, ciki har da wasu al'ummomi, iyaye sun dade suna kallon duka a matsayin wata hanya ta koya wa yaro biyayya.
Sai dai bayanan binciken da aka gabatar wa ‘yan majalisar sun sake haifar da muhawara kan abin da ya kamata a kira ingantacciyar tarbiyya.
Tambayar ita ce: Shin manufar horo ita ce kawai yaro ya ji tsoron hukunci, ko kuwa ya fahimci kuskurensa kuma ya koyi yadda zai zama mutum mai ɗaukar nauyi?
A cewar masana, amsar wannan tambayar na iya sauya yadda iyaye ke kallon tarbiyyar yara.
