“El-Rufai Ya Yi Zaton Tsare Shi Zai Janyo Rikici a Arewa” – BKO Shugaban TVC
Daga Wakiliya
Fitaccen dan jarida kuma Daraktan Labarai na TVC News, Babajide Kolade-Otitoju, ya ce tsohon Gwamnan Kaduna, Nasir El-Rufai, ya yi tunanin tsare shi zai janyo gagarumar hayaniya ko zanga-zanga a Arewacin Najeriya.
Babajide Kolade-Otitoju, wanda aka fi sani da BKO, ya ce a maimakon haka, El-Rufai ya samu kansa cikin yanayi na kadaici, inda wasu daga cikin mutanen da ya taba taimakawa a siyasance suka yi watsi da shi suka yi shiru.
Da yake magana a shirin Issues With Jide na TVC News, BKO ya ce El-Rufai ya shafe sama da kwanaki 200 a tsare a hannun ICPC, yayin da sharuddan belinsa suka kasance masu wahalar cikawa.
Ya ce idan ba a sauya sharuddan belin ba, akwai yiwuwar tsohon gwamnan ya ci gaba da kasancewa a tsare har bayan zaben 2027.
BKO ya kuma ce wasu daga cikin shugabannin Arewa da mutanen da suka kasance kusa da El-Rufai a baya ba su fito fili suna magana kan lamarin ba.
A cewarsa, wannan yanayin na nuna yadda siyasa za ta iya sauya alakar mutane, musamman idan wani mutum ya samu kansa cikin rikici da hukumomin gwamnati.
El-Rufai na fuskantar shari’o’in da suka shafi zarge-zargen cin hanci da rashawa, yayin da ake ci gaba da muhawara kan tsawon lokacin da ya shafe a tsare da kuma sharuddan belinsa.
