Maza ba wawaye bane: Ba za ki yi wa mijinki rashin kunya sannan ki sa ran zai ci gaba da sonki ba – Malama Zainab
Daga Wakiliya
Wata mai ba da shawarar zamantakewar aure, Jamiu Zainab, ta shawarci mata da su rika nuna girmamawa ga mazajensu domin samun kyakkyawar dangantaka a cikin aure.
Jamiu Zainab, wadda ke zaune a Abuja, ta bayyana hakan ne a wani bidiyo da ta wallafa a shafukanta na sada zumunta.
Ta ce yadda mace ke magana da mijinta na daga cikin abubuwan da ka iya shafar yadda yake mu'amala da ita, tana mai cewa maza ba wawaye ba ne.
“Ba za ki yi magana da mijinki yadda kika ga dama ba sannan ki yi tsammanin zai ci gaba da sonki. Ba haka abun yake ba,” in ji ta
Jamiu Zainab ta ce wasu mata ba sa son a yi musu gyara, kuma kan yi gardama ko mayar da magana idan mazajensu suka yi magana da su.
Ta ce irin wannan dabi'a na iya haifar da rashin jituwa da rage soyayya a tsakanin ma'aurata.
Sai dai ta jaddada cewa girmamawa da kyakkyawar iya magana tsakanin ma'aurata na da muhimmanci wajen gina gida mai dorewa.
Jamiu Zainab ta shahara wajen bayar da shawarwari kan harkokin aure da zamantakewa, musamman kan yadda maza da mata za su inganta dangantakarsu da gina iyalai masu zaman lafiya da kaunar juna.
