‘Maza A Yanzu Ba Sa Son a Ce Su Masu Tsananin Nuna Soyayya Ne’ — Mawakiya Tyla
Mawakiyar Afirka ta Kudu, Tyla Laura Seethal, wacce aka fi sani da Tyla, ta ce maza da dama a wannan zamani ba sa son bayyana irin soyayyar da suke yi saboda tsoron kada a kira su “basimpe ko simpawa” wato mutumin da ke nuna tsananin kulawa da soyayya ga mace.
Tyla ta bayyana hakan ne yayin wata tattaunawa, inda ta ce soyayya ta zama mai wahala saboda yadda wasu maza ke ƙoƙarin ɓoye yadda suke ji.
Ta ce dangantaka mai kyau tana buƙatar daidaito, inda mutum zai san lokacin da ya kamata ya nuna kulawa da kuma lokacin da ya kamata ya rage.
A cewarta, maza da dama yanzu suna jin kunyar nuna ƙauna sosai saboda tsoron abin da mutane za su ce.
Sai dai Tyla ta ƙarfafa maza da kada su ji kunya idan suna son matansu.”
Idan kana son matarka, ka fito ka nuna hakan. Kada ka ji kunya,” in ji ta.
