Sabon rahoton Moniepoint na shekarar 2025 ya nuna cewa mata masu kananan da matsakaitan sana’o’i (SMEs) a Najeriya sun fi maza iya biyan bashin kasuwanci cikin lokaci.
A cewar rahoton, yawan mata da suka kasa biyan bashin da aka ba su ya ragu har sau 2.5 idan aka kwatanta da maza, duk da cewa mata na ci gaba da fuskantar ƙalubale wajen samun rancen kuɗi daga cibiyoyin hada-hadar kuɗi.
Rahoton ya kuma bayyana cewa yawan rancen da Moniepoint ya bai wa mata masu kasuwanci ya ƙaru da fiye da kashi 300 cikin 100 a shekarar 2025.
Bugu da ƙari, kashi 62 cikin 100 na matan ‘yan kasuwa da aka yi wa bincike sun ce wannan ne karo na farko da suka samu bashin kasuwanci daga hukuma.
Moniepoint ta ce alkaluman sun nuna cewa, duk da matsalolin da mata ke fuskanta wajen samun rance saboda buƙatar jingina ko rashin tarihin bashi, suna daga cikin rukunin masu kasuwanci da suka fi nuna amana wajen biyan bashin da suka karɓa.
