Manna Firiji da Bango Ka Iya Jawo Ƙarin Cin Wutar Lantarki -inji masana

Me Ya Sa Dole A Bar Tazara Tsakanin Firiji da Bango? Masana Sun Yi Bayani

Daga Wakiliya

Masana sun shawarci masu amfani da firiji da su tabbatar sun bar isasshen tazara tsakanin firiji da bango domin na’urar ta yi aiki yadda ya kamata tare da rage yawan amfani da wutar lantarki.

A cewar masana’antun firiji, tazarar da ya dace ba ɗaya ba ce. Kamfanin LG ya ba da shawarar a bar santimita 10 tsakanin bayan firiji da bango, sannan a bar santimita 30 tsakanin saman firiji da rufi.

Shi kuma Samsung ya ce mafi dacewa shi ne a bar santimita 5 zuwa 7 a kowane gefe na firiji, amma idan sarari ya yi ƙanƙanta, aƙalla santimita 2 zuwa 3 zai iya isa.

Masana sun bayyana cewa wannan tazara tana ba firiji damar fitar da zafi yadda ya kamata. Idan aka matse shi da bango ko kabad ba tare da isasshen sarari ba, hakan na iya sa firiji ya riƙa aiki fiye da kima, ya ƙara cin wutar lantarki, har ma ya rage tsawon rayuwar na’urar.

Saboda haka, ana ba masu siyan sabon firiji shawarar su karanta umarnin da masana’anta suka bayar kafin girkawa, domin kauce wa matsalolin da ka iya tasowa daga rashin barin isasshen tazara tsakanin firiji da bango.