Gwamnatin Tarayya ta ƙaddamar da shirin Power Force Programme ƙarƙashin Presidential Metering Initiative (PMI) domin horas da matasa 5,000 a matsayin ƙwararrun masu girka mitocin wutar lantarki a faɗin Najeriya.
Ministan Wutar Lantarki, Joseph Tegbe, ya bayyana yayin ƙaddamar da shirin a ranar Alhamis cewa matakin zai taimaka wajen rage ƙarancin mitoci, samar da ayyukan yi ga matasa, da kuma inganta tsarin wutar lantarki a ƙasar.
Joseph Tegbe ya ce rashin isassun mitoci na daga cikin manyan matsalolin da ke hana ci gaban ɓangaren wutar lantarki, yana mai jaddada cewa idan ba a auna yawan wutar da aka yi amfani da ita yadda ya kamata ba, ba za a iya tara kuɗin da ya dace ba, lamarin da ke hana zuba jari da inganta ayyuka.
Ya ce manufar Shugaba Bola Ahmed Tinubu ita ce tabbatar da cewa kowane ɗan Najeriya yana biyan kuɗin wutar da ya yi amfani da ita kawai, yayin da kamfanonin samar da wuta su ma suke karɓar kuɗin wutar da suka samar.
A cewarsa, amfani da mitoci na zamani zai rage tsarin ƙiyasin kuɗin wuta (estimated billing), ya rage saɓani tsakanin masu amfani da wuta da kamfanonin rarraba wuta, tare da ƙara gaskiya da amincewar jama’a ga ɓangaren wutar lantarki.
Joseph Tegbe ya kuma yabawa Association of Meter Asset Providers of Nigeria (AMMON) bisa janye ƙarar da ta shafi shirin samar da mitoci, yana mai cewa hakan zai hanzarta rabon mitoci a faɗin ƙasar. Ya bayyana cewa matasan da za a horas za su zama ginshiƙin aikin girka mitocin zamani a Najeriya, tare da tabbatar da cewa gidaje da kasuwanci miliyoyi sun samu mitoci da aka girka bisa ƙa’idodin fasaha da tsaro.
Ministan ya buƙaci waɗanda suka shiga kashi na farko na shirin su yi amfani da damar wajen koyon sana’ar yadda ya kamata, yana mai cewa ƙwarewar da za su samu za ta buɗe musu ƙofofin ayyukan yi tare da taimakawa bunƙasar tattalin arzikin ƙasa.
A ƙarshe, Joseph Tegbe ya bayyana shirin a hukumance a madadin Shugaba Bola Ahmed Tinubu, yana jaddada ƙudirin Gwamnatin Tarayya na gina ingantaccen, gaskiya da dorewar tsarin wutar lantarki domin amfanin ‘yan Najeriya.
