AN fara Zargin FIFA da Nuna Son Kai Ga Messi Da Argentina a gasar world cup

Daga Wakiliya

Ana ci gaba da taƙaddama a kafafen sada zumunta yayin da wasu magoya baya ke zargin FIFA da nuna son kai ga Argentina da tauraron ƙwallonta, Lionel Messi, kafin wasan ƙarshe na gasar Kofin Duniya da Spain.

Zargin ya ƙaru ne bayan nasarar da Argentina ta samu a kan Masar, inda masu sukar suka ce wasu hukunce-hukuncen alƙalai sun fifita Argentina. Kocin Masar, Hossam Hassan, ya bayyana wasan a matsayin “rashin adalci”, yana mai cewa wasu hukuncin alƙalai sun cutar da ƙungiyarsa, har ya yi zargin cewa FIFA na son Messi ya ci gaba da zama a gasar.

Sai dai kocin Argentina, Lionel Scaloni, ya musanta zarge-zargen, yana cewa irin waɗannan maganganu sun daɗe ana yi kan Argentina, kuma babu wata hujja da ke nuna FIFA tana nuna masu son kai. Haka kuma shugaban alƙalan FIFA, Pierluigi Collina, ya ce babu wanda zai iya yin tasiri kan alƙalan FIFA, ko da shugaban FIFA Gianni Infantino ne.

A kafafen sada zumunta kuwa, an yaɗa hotuna da bidiyoyi da ke zargin FIFA da fifita Messi, ciki har da wasu da aka ƙirƙira da fasahar AI, yayin da wasu sakonni suka yi ikirarin ba tare da hujja ba cewa Messi ya biya kuɗi domin samun ƙarin bugun fenariti.

Messi, wanda Forbes ta kiyasta arzikinsa ya kai dala biliyan 1.1, ya zura ƙwallaye takwas a gasar bana, abin da ya sa yake kan gaba wajen cin ƙwallaye tare da Kylian Mbappe na Faransa.

Argentina za ta kara da Spain a wasan ƙarshe na gasar ranar Lahadi a filin wasa na MetLife da ke jihar New Jersey, Amurka.