Daga Wakiliya
Matakin gwamnatin tarayya na dakatar da amfani da Frontier Exploration Fund (FEF) wajen binciken sabbin rijiyoyin mai a yankunan Arewa ya jawo suka daga wasu masu ruwa da tsaki a fannin makamashi.
Rahoton Majiyar Wakiliya ya ce Dokar Zartarwa ta 9 (Executive Order 9) da Shugaba Bola Ahmed Tinubu ya sanya ta karkatar da kuɗaɗen da aka ware domin binciken mai a yankunan Bida Basin, Benue Trough da Gongola Basin zuwa Asusun Tarayya.
Masana sun yi gargaɗin cewa wannan mataki na iya rage ƙoƙarin gano sabbin rijiyoyin mai, tare da shafar shirin faɗaɗa arzikin man Najeriya zuwa yankunan da ba a fara hako mai sosai ba.
Haka kuma, wasu sun bayyana damuwa cewa matakin na iya haifar da rashin tabbas ga masu zuba jari, tare da rage damar bunƙasar tattalin arziki da samar da ayyukan yi a yankunan da abin ya shafa.
Wakiliya ta lura cewa waɗannan bayanai sun samo asali ne daga rahoton Daily Nigerian da ra’ayoyin wasu masu ruwa da tsaki, yayin da gwamnatin tarayya ba ta fitar da wata sanarwa da ke mayar da martani kan waɗannan korafe-korafen ba.
