Kirista ya shiga Gasar Karatun Alƙur’ani a Masar, ya ci kyautar Umrah ya bai wa maƙwabciyarsa Musulma
Daga Wakiliya
Wani Kirista a Masar mai suna Mina ya lashe kyautar zuwa Umrah bayan shiga gasar tambayoyin Alƙur’ani, da nufin bai wa maƙwabciyarsa Musulma kyautar.
Mina ya ce ya shiga gasar ne bayan ya fahimci cewa maƙwabciyarsa, Um Ali, ta daɗe tana fatan zuwa Umrah.
Domin ƙara damar samun nasara, Mina ya aika da amsar da ta dace sama da sau 50, kuma daga ƙarshe ya zama wanda ya lashe kyautar.
Ya ce tun farko manufarsa ita ce ya ba Um Ali damar cika burinta.
Um Ali ta bayyana farin cikinta, inda Mina ya ce ya gan ta tana share hawayen farin ciki bayan ya sanar da ita cewa za ta samu damar zuwa Umrah.
Su biyun sun kasance maƙwabta na kusan shekaru 20, kuma Mina ya ce yana kallon Um Ali kamar ’yar uwa.
Lamarin ya jawo yabo a kafafen sada zumunta a Masar, musamman kan kyakkyawar dangantakar da ke tsakanin maƙwabta Musulmi da Kirista.
