Gwamnatin Birtaniya ta bukaci Musulmi su rage amfani da ruwa wajen alwala
Daga Wakiliya
Gwamnatin Birtaniya ta shawarci Musulmi su rage yawan ruwan da suke amfani da shi yayin alwala.
Hukumar kula da harkokin ruwa ta kasar, Ofwat, ta ce Musulmi za su iya amfani da kwalbar ruwa lita daya wajen alwala, maimakon barin famfo a bude.
A cewar hukumar, hakan na iya rage amfani da ruwa da kusan lita 55 ga mutum daya a rana.
An kuma shawarci kamfanonin ruwa da su isar da sakon ta hanyar tashoshin talabijin na Musulunci.
Sai dai shawarar ta jawo ce-ce-ku-ce a tsakanin wasu Musulmi, wadanda suka ce mayar da hankali kan alwala na iya sa a dauki Musulmi a matsayin wadanda ke barnatar da ruwa.
Wasu masu fafutukar kare hakkin al'umma sun kuma ce Musulunci kansa ya yi kira da a guji barnatar da ruwa yayin alwala (almubazzaranci haramun ne a musulunci).
A yayin da ake wannan muhawara, kungiyar Greenpeace UK ta ce matsalar zubar ruwan bututu ma na daga cikin manyan abubuwan da ke haddasa asarar ruwa a Birtaniya.
Kungiyar ta ce kusan lita biliyan 2.87 na ruwa na bacewa a kowace rana a Ingila da Wales saboda bututun ruwa da ke zubewa.
Ta ce wannan adadi ya yi daidai da kusan tafkunan iyo na gasar Olympics 1,150.
