An kama wani mutum a Birtaniya bayan ya hau rufin asibiti sanye da kayan “Mutuwa”, yana tsorata marasa lafiya
Daga Wakiliya
An gurfanar da wani mutum mai suna Leon Gillespie a gaban kotu bayan da ya hau rufin Asibitin Ysbyty Glan Clwyd da ke Arewacin Wales a Birtaniya, sanye da baƙaƙen kaya tare da riƙe wani dogon abu mai kama da wuƙa, lamarin da ya tayar da hankalin marasa lafiya da ma'aikatan asibitin.
Lamarin ya faru ne a watan Yunin 2026, inda shaidu suka ce Gillespie ya tsaya a saman rufin asibitin yana kallon mutanen da ke ƙasa ba tare da ya yi magana ba. Da dama sun yi zaton ya sanya kayan da ke wakiltar Grim Reaper, wani sanannen alamar mutuwa a al'adun Yammacin Turai (Mala'ikan Mutuwa).
Sai dai daga baya Gillespie ya shaida wa kotu cewa kayan da ya sanya ba na Grim Reaper ba ne, yana mai cewa yana ƙoƙarin kwaikwayon tsuntsun crow ne.
Bayan samun rahoton lamarin, jami'an ‘yan sanda da na kashe gobara sun isa wurin, inda suka kama shi.
Gillespie ya amsa laifin tayar da hankali da haddasa cikas a harabar asibitin NHS. Kotu ta ci tararsa fam 200, sannan tare da wasu tara da suka shafi laifukan sata da ya aikata a baya, an umarce shi ya biya kusan fam 450 gaba É—aya.
Hukumar asibitin ta sake jaddada cewa ba za ta lamunci duk wani hali na razanarwa, tashin hankali ko tayar da tarzoma a harabarta ba.
