‘Yan sanda sun kwace motoci 72 a Kano saboda rufe lambar mota

Daga Wakiliya

Rundunar ‘Yan Sandan Jihar Kano ta kwace motoci 72 saboda amfani da lambobin mota da aka rufe, aka lalata ko kuma babu su, a wani sabon samame da ta kaddamar mai suna “Operation Clean Plates.”

Kwamishinan ‘Yan Sandan Jihar Kano, Ibrahim Bakori, ya bayyana hakan a taron manema labarai da ya gudanar a ofishin Motor Traffic Division da ke BUK Road a Kano.

Ibrahim Bakori ya ce masu laifi na amfani da irin wadannan motoci wajen aikata laifuka domin kauce wa ganowa, saboda haka rundunar ta fara aikin ne bayan ta wayar da kan jama’a ta kafafen rediyo, talabijin da kuma kafafen sada zumunta.

Ya ce zuwa yanzu an kwace motoci 72, kuma za a gurfanar da direbobinsu a gaban kotu.

Kwamishinan ya kuma bayyana cewa an kama wasu motoci uku cikin yanayi mai cike da shakku, bayan wadanda ke cikinsu sun kasa bayar da gamsasshen bayani. Ya ce ana ci gaba da bincike kan lamarin.

Ibrahim Bakori ya jaddada cewa aikin ba don takura wa jama’a ba ne, sai dai domin inganta tsaro da tabbatar da cewa ana iya tantance kowace mota da ke amfani da hanyoyin jihar.

Ya bukaci masu ababen hawa su tabbatar da cewa lambobin motocinsu na doka ne kuma a bayyane suke, tare da kira ga jama’a su kai rahoton duk wani rashin da’a da suka gani daga jami’an ‘yan sanda.