INEC ta tsawaita rajistar masu zaɓe a Legas

Daga Wakiliya

Hukumar Zaɓe Mai Zaman Kanta ta Ƙasa (INEC) ta tsawaita wa’adin ci gaba da rajistar masu zaɓe (CVR) a Jihar Legas da makonni biyu, inda sabon ranar ƙarshe ta koma 26 ga Yulin 2026 maimakon 10 ga Yuli.

Hukumar ta bayyana cewa an ɗauki matakin ne domin bai wa ƙarin mutanen da suka cancanci yin rajista damar shiga cikin kundin masu zaɓe kafin zaɓuɓɓuka masu zuwa.

Haka kuma, INEC ta sanar da ƙaddamar da sabon tsarin rajistar kai tsaye ta yanar gizo ga waɗanda za su yi rajista karo na farko. Tsarin zai fara aiki daga 8 ga Yulin 2026, inda masu neman rajista za su iya cike bayanansu ta na’urorinsu ta hanyar shafin rajistar CVR na hukumar.

Kwamishinan Zaɓe na Jihar Legas, Farfesa Ayobami Salami, ya buƙaci duk waɗanda suka cancanci yin rajista amma ba su yi ba da su yi amfani da karin wa’adin da kuma sabon tsarin rajistar ta yanar gizo.