Yadda ilimi da masana’antu suka sauya Koriya ta Kudu daga talauci zuwa kasa mafi arziki cikin shekaru 70

Daga Wakiliya

A shekarar 1953, Koriya ta Kudu na daga cikin ƙasashen da suka fi talauci a duniya. Yaƙi ya lalata ƙasar, masana’antu sun rushe, albarkatun ƙasa ba su da yawa, kuma tattalin arzikinta ya fi na wasu ƙasashe masu fama da talauci a wancan lokaci.

Amma daga shekarar 1961, gwamnati ta fara aiwatar da tsare-tsare na dogon lokaci. Ta mayar da hankali kan:

– Gina masana’antu.
– Inganta ilimi.
– Tallafa wa manyan kamfanoni.
– Samar da kayayyaki domin fitarwa zuwa kasuwannin duniya.

A hankali ƙasar ta daina dogaro da noma kawai, ta koma kera motoci, jiragen ruwa, wayoyin hannu da kuma memory chips da ake amfani da su a kwamfuta, wayoyi da fasahar AI.

Yau, Koriya ta Kudu na cikin manyan tattalin arziki 10 na duniya, kuma kamfanoni irin su Samsung, Hyundai, LG da SK Hynix sun zama sanannu a faɗin duniya.

Darasi: Ci gaban ƙasa ba ya ta’allaka da albarkatun ƙasa kaɗai. Kyakkyawan tsari, ilimi, aiki tukuru da manufofi masu ɗorewa na iya sauya makomar kowace ƙasa.