Na je Italiya domin yin addu’a ga Najeriya, musamman kan matsalolin rashin tsaro, ‘yan bindiga da ta’addanci -inji Akpabio
Daga Wakiliya
Shugaban Majalisar Dattawa, Godswill Akpabio, ya ce ya je Italiya domin yin addu’a ga Najeriya, musamman kan matsalolin rashin tsaro, ‘yan bindiga da ta’addanci.
Akpabio ya bayyana cewa ya kai ziyara wurin ibadar St. Padre Pio da ke San Giovanni Rotondo, inda ya yi addu’a ga Najeriya da shugabanninta.
Ya ce addu’ar ta shafi Shugaba Bola Tinubu, da shi kansa, da mataimakin shugaban ƙasa, da ‘yan Majalisar Tarayya da sauran jami’an gwamnati.
Akpabio ya ce ya kuma roƙi Allah ya kawo ƙarshen rashin tsaro, ‘yan bindiga da ta’addanci a Najeriya.
Ya bayyana tafiyar a matsayin wata gajeriyar ziyarar ibada, yana mai cewa a imaninsa, ƙoƙarin ɗan Adam ba ya wadatarwa sai da kariyar Allah.
