Mutfwang ya haramta ayyukan ‘HISBA’ a Jihar Plateau, ya umarci jami’an tsaro su kama su
Daga Wakiliya
Gwamnan Jihar Plateau, Caleb Mutfwang, ya umarci jami’an tsaro da su dakile ayyukan wata ƙungiya da ke amfani da sunan HISBA a wasu sassan ƙaramar hukumar Jos North.
Gwamnan ya bayyana ayyukan ƙungiyar a matsayin ba bisa doka ba, ba tare da izini ba kuma waɗanda ba za a amince da su ba a jihar.
A wata sanarwa da Daraktan Yaɗa Labarai da Hulɗa da Jama’a na gwamnan, Dr Gyang Bere, ya fitar ranar Lahadi, Mutfwang ya ce jami’an tsaro su gano mutanen da ke gudanar da ayyukan, su bincike su, sannan su kama tare da gurfanar da waɗanda aka samu da laifi.
Sanarwar ta ce an samu rahotannin cewa wasu daga cikin ayyukan ƙungiyar sun haɗa da tsoratar da mutane, cin zarafi, karɓar kuɗi daga mazauna da kuma ƙaƙaba musu wasu dokoki da ba su da izinin sanya wa jama’a.
Gwamnan ya ce babu wani mutum ko ƙungiya da ke da ikon ɗaukar matsayin gwamnati ko jami’an tilasta doka a jihar ba tare da izinin da doka ta ba su ba.
Ya ce Plateau tana da kundin tsarin mulki guda ɗaya, tsarin shari’a guda ɗaya da kuma halastacciyar hukuma guda ɗaya, don haka babu wani mutum ko ƙungiya da ke da ikon kafa wata hukuma a gefe.
“Babu wani mutum ko ƙungiya da ke da ikon naɗa kanta a matsayin gwamnatin Jihar Plateau,” in ji sanarwar da ta ambato gwamnan.
Ya kuma umarci jami’an tsaro su ƙara tattara bayanan sirri tare da gudanar da bincike domin gano waɗanda ke da hannu, da kuma kare mazauna jihar daga tsoratarwa, cin zarafi, karɓar kuɗi ko wani nau’in tilastawa da ya saɓa wa doka.
Ba a yi wa wata ƙabila ko addini hari ba
Gwamna Mutfwang ya jaddada cewa matakin ba ya nufin wani addini, ƙabila ko wata al’umma ba.
Ya ce mutanen Plateau daga addinai da ƙabilu daban-daban suna da haƙƙin samun kariya iri ɗaya a ƙarƙashin doka.
A cewar sanarwar, batun da gwamnatin jihar ke dubawa shi ne bin doka da kuma ikon halastacciyar hukuma, ba addini ko ƙabila ba.
Gwamnan ya ce kowane mazaunin Plateau na da damar yin ibada, aiki, gudanar da kasuwanci da sauran harkokinsa na yau da kullum ba tare da tsoratarwa ko tsangwama daga wata ƙungiya da ta ɗauki doka a hannunta ba.
Mutfwang ya kuma gode wa mazauna jihar da suka kai rahoton ayyukan ƙungiyar ga hukumomi, yana mai cewa gwamnatinsa za ta ci gaba da ɗaukar duk wani sahihin rahoton da ya shafi tsaro da muhimmanci.
Ya sake jaddada cewa kare rayukan jama’a, haƙƙoƙinsu, mutuncinsu da ‘yancinsu na halal na daga cikin muhimman nauyin da ke kan gwamnati.
Ya ce gwamnatinsa za ta ci gaba da kare zaman lafiya da haɗin kan al’ummar Plateau, tare da tabbatar da cewa doka ita ce mafi girman iko a jihar.
