Masana Sun Gano Hanyar Dakatar da Lalacewar Haƙora Ba Tare da An Cire Shi Ba
Daga Wakiliya
Masana kimiyya a Amurka sun gano cewa wani magani mai ruwa da ake kira Silver Diamine Fluoride (SDF) na iya dakatar da lalacewar haƙora ba tare da an cire haƙorin ko an yi allurar kashe zafi ba.
Wani babban bincike da aka wallafa a mujallar JAMA Pediatrics ya nuna cewa shafa maganin SDF mai ƙarfi kashi 38 cikin ɗari a kan haƙoran yara masu ƙasa da shekara shida duk bayan watanni shida ya dakatar da ci gaban lalacewar haƙora a fiye da rabin haƙoran da aka yi wa maganin.
Masu binciken sun ce ana shafa maganin ne cikin daƙiƙu kaɗan ta amfani da ƙaramin auduga, ba tare da buƙatar cire haƙorin ko allura ko sa barci ba. Sai dai maganin yana sa wurin da haƙorin ya lalace ya koma baƙi har abada.
Jagorar binciken, Farfesa Margherita Fontana ta Jami’ar Michigan, ta ce maganin yana da matuƙar aminci har ma ga yara masu shekara ɗaya, kuma zai iya taimaka wa yara ƙanana, tsofaffi, masu nakasa da kuma mutanen da ke tsoron zuwa wurin likitan haƙori.
Binciken ya haɗa da yara 830 daga jihohin Michigan, New York da Iowa, kuma masana sun ce sakamakon zai iya taimakawa Hukumar Abinci da Magunguna ta Amurka (FDA) ta amince da amfani da SDF a hukumance wajen magance lalacewar haƙora.
Masana sun yi imanin cewa idan aka amince da maganin, zai taimaka wajen rage ciwon haƙora, kamuwa da cututtuka da kuma buƙatar yi wa yara tiyata saboda matsalar lalacewar haƙora.
