Kotu a Rasha Ta Kwace Kadarori 123 Mallakin Ƙungiyar Kiristoci ta Jehovah’s Witnesses
Wata kotu da ke birnin Moscow na ƙasar Rasha ta ba da umarnin kwace kadarori 123 mallakin Ƙungiyar Kiristoci ta Jehovah’s Witnesses tare da mayar da su mallakin gwamnatin ƙasar.
A cewar hukumar kotunan Moscow, kadarorin sun haɗa da gidaje da wuraren kasuwanci 63 masu faɗin sama da murabba’in mita 11,000, da kuma filaye 60 masu girman hekta 5.6 da ke sassa daban-daban na ƙasar.
Kotun ta ce an yi wa waɗannan kadarori rajista ne da sunan reshen Ƙungiyar Jehovah’s Witnesses na ƙasar Sweden.
A shekarar 2017 ne wata kotu a Rasha ta ayyana Ƙungiyar Jehovah’s Witnesses a matsayin “ƙungiya mai tsattsauran ra’ayi”, tare da haramta ayyukanta a ƙasar.
Sai dai a shekarar 2022, Kotun Kare Haƙƙin Bil Adama ta Turai ta yanke hukuncin cewa haramta ƙungiyar ya saɓa wa doka.
Tun bayan haramcin, an daure mambobi da dama na Ƙungiyar Jehovah’s Witnesses a Rasha bayan an same su da laifin gudanar da abin da hukumomi suka bayyana a matsayin ayyukan tsattsauran ra’ayi.
