Kusan kashi 99% na kasashen duniya za su kasance cikin hasken rana lokaci guda a ranar Laraba

Daga Wakiliya

Kusan kashi 99 cikin 100 na al’ummar duniya za su kasance cikin hasken rana ko kuma lokacin magariba mai haske (twilight) a lokaci guda a ranar Laraba, da misalin ƙarfe 11:10 na safe agogon GMT.

Masana sun ce hakan na faruwa ne sakamakon karkatar duniyar ƙasa da kuma lokacin bazarar yankin arewacin duniya, lamarin da ke sa mafi yawan yankunan da mutane ke zaune su kasance cikin hasken rana a lokaci guda.

A wannan ɗan gajeren lokaci da bai wuce minti guda ba, kusan mutane biliyan 8.2 za su kasance cikin hasken rana ko hasken magariba, yayin da kusan mutum miliyan 83 kacal, wato kashi 1 cikin 100 na al’ummar duniya, za su kasance cikin cikakken dare.

Nahiyoyin Arewacin Amurka, Kudancin Amurka, Turai, Afirka da mafi yawan yankunan Asiya za su kasance cikin hasken rana. Sai dai Australia, New Zealand, wasu sassan Kudu maso Gabashin Asiya da Antarctica ne za su kasance cikin dare.

Masana sun bayyana cewa ba ranar 8 ga Yuli kaɗai wannan al’amari ke faruwa ba. A kowace shekara, daga kusan 18 ga Mayu zuwa 17 ga Yuli, ana samun irin wannan yanayi na kusan minti guda a kowace rana, inda mafi yawan mutanen duniya ke cikin hasken rana ko hasken magariba a lokaci guda.

Rahotanni sun ce wannan batu ya yi fice ne bayan wani saƙo da ya bazu a kafafen sada zumunta a shekarar 2022, wanda ya yi ikirarin cewa ranar 8 ga Yuli ce kaɗai hakan ke faruwa. Amma bincike daga Time and Date ya nuna cewa irin wannan yanayi na maimaituwa na kusan kwanaki 60 a kowace shekara