Daga Wakiliya
Fitacciyar malamar addini kuma mai ba da shawara kan zaman aure, Funke Felix-Adejumo, ta shawarci maza masu aure da kada su takura wa kansu ko su sadaukar da rayuwarsu wajen ƙoƙarin faranta wa matansu rai.
Da take jawabi a taron Recharge Conference, ta ce babu wani namiji da zai iya gamsar da mace gaba ɗaya, saboda dabi’ar mata ita ce son ganin abubuwa sun fi yadda suke.
Ta ce maza su yi iyakar ƙoƙarinsu wajen kula da iyalansu, amma kada su kai ga lalata lafiyarsu ko rayuwarsu saboda hakan.
Hakazalika, ta buƙaci mata su nemi hanyoyin samun kuɗin kansu maimakon dogaro kacokan da mazajensu, tana mai cewa mace ya kamata ta kasance tana da nata abin hannu domin ta ma iya yi wa mijinta kyauta da mamaki.
A cewarta, rayuwar mace bai kamata ta tsaya kan jiran abin da mijinta zai kawo ba, illa ta kasance mai cin gashin kanta ta fuskar tattalin arziki.
