Daga Wakiliya
Attajirin ɗan kasuwa kuma fitaccen mai ayyukan jin kai na Amurka, T. Denny Sanford, ya rasu yana da shekara 90 bayan ya shafe shekaru yana rabon mafi yawan dukiyarsa ga ayyukan alheri.
Sanford ya shahara da furucin da ya yi cewa: “Ina so na mutu ba tare da arziki ba.” A rayuwarsa, ya bayar da sama da dala biliyan 4 domin tallafa wa fannin lafiya, ilimi, binciken kimiyya da sauran ayyukan ci gaban al’umma.
Kimanin dala biliyan 2 daga cikin gudummawar tasa ya bai wa cibiyar lafiya da yanzu ake kira Sanford Health, wacce ta zama ɗaya daga cikin manyan cibiyoyin kiwon lafiya a yankunan karkarar Amurka.
Sanford ya fara rayuwa cikin talauci, amma ya tara dukiyarsa ne ta hanyar harkar banki, musamman kasuwancin katin bashi (credit cards), wanda ya sa ya zama ɗaya daga cikin attajiran Amurka.
Ko da yake sunansa ya taɓa shiga cikin binciken wata zargi a shekarar 2020, ba a gurfanar da shi a kotu ba bayan hukumomi suka ce ba su samu hujjar tuhuma a ƙarƙashin dokokin jiharsu ba.
Har zuwa rasuwarsa a ranar 18 ga Yuli, an kiyasta sauran dukiyarsa ta kai kusan dala biliyan 2.4, duk da cewa ya riga ya bayar da biliyoyin daloli domin amfanin al’umma.
#Wakiliya | Muryar Arewa a Duniya
