Daga Wakiliya
Gwamnatin Tarayya ta ware kimanin Naira biliyan 8.05 a cikin kasafin kuɗin shekarar 2026 domin gina, gyarawa da kuma inganta masallatai da coci-coci a sassa daban-daban na ƙasar nan, duk da cewa kasafin ya nuna gibin kuɗi na Naira tiriliyan 31.45.
Rahoton Tracka, wani shiri na ƙungiyar BudgIT da ke bibiyar yadda ake kashe kuɗaɗen gwamnati, ya nuna cewa an tanadi kuɗin ne domin aiwatar da ayyuka 59 da suka shafi wuraren ibada.
Daga cikin kuɗin, an ware Naira biliyan 6.14 domin ayyuka 52 da suka shafi masallatai, yayin da aka ware Naira biliyan 1.91 domin ayyuka 7 na coci-coci.
Rahoton ya ce kuɗaɗen za su haɗa da gina sababbin masallatai da coci-coci, gyaran tsofaffi, samar da hasken rana (solar), rijiyoyin burtsatse, kafet, makarantun Islamiyya, shinge da gidajen limamai.
Sai dai binciken ya kuma nuna cewa wasu daga cikin waɗannan ayyukan an ɗora su ne kan hukumomi da ma’aikatun gwamnati waɗanda aikinsu bai shafi gina wuraren ibada ba.
A halin yanzu, kasafin kuɗin Najeriya na shekarar 2026 ya kai kusan Naira tiriliyan 68.3, yayin da aka ware Naira tiriliyan 15.8 domin biyan bashin ƙasa kaɗai. Bayanai daga Debt Management Office (DMO) kuma sun nuna cewa bashin Najeriya ya kai Naira tiriliyan 159.28 zuwa ƙarshen shekarar 2025.
