Daga Wakiliya
Rundunar ‘Yan Sandan Babban Birnin Tarayya (FCT) ta cafke wasu jami’anta huɗu da ake zargi da karɓar cin hanci da ƙwace wa Shugaban Hukumar Yaƙi da Cin Hanci da Rashawa ta ICPC, Dr. Musa Aliyu (SAN), kuɗi har Naira 53,000 a wani shingen bincike da suka kafa ba bisa ƙa’ida ba a yankin Banex da ke Wuse, Abuja.
Kwamishinan ‘Yan Sandan FCT, Ahmed Sanusi, ya bayyana cewa jami’an sun bar wuraren aikinsu, suka haɗu suka kafa shingen bincike domin karɓar kuɗi daga masu ababen hawa, ba tare da sun san cewa mutumin da suka tare shi ne shugaban ICPC ba.
A cewarsa, jami’an sun tilasta wa Dr. Musa Aliyu cire Naira 53,000 ta hanyar POS, har ma ya biya kuɗin cajin cire kuɗin, kafin suka raba kuɗin a tsakaninsu.
Ahmed Sanusi ya bayyana jami’an a matsayin “ɓarayi da ba su cancanci sanya kayan aikin ‘yan sanda ba,” yana mai cewa an kama dukkansu kuma za a hukunta su, inda ya ce waɗanda suka cancanci kora daga aiki za a kore su.
Kwamishinan ya kuma sake jaddada umarnin Sufeto Janar na ‘Yan Sanda cewa babu wani jami’i da ke da ikon tsayar da mutum a hanya ya tilasta masa miƙa wayarsa domin bincike. Ya buƙaci jama’a su ƙi amincewa da irin wannan buƙata, sannan su gaggauta kai rahoto ga rundunar ‘yan sanda idan hakan ta faru.
