Wani tsohon faifan bidiyo da ya sake bayyana daga shekarar 1986 ya nuna matashin Yoweri Museveni yana alƙawarin yin mulkin zango ɗaya kacal domin kawo ƙarshen mulkin kama-karya a Uganda. Sai dai bayan kusan shekaru 40, har yanzu shi ne shugaban ƙasar.
A cikin bidiyon, Museveni ya ce zai karya al’adar shugabannin da ke daɗewa kan mulki a Afirka, yana mai cewa babbar matsalar nahiyar ita ce shugabannin da ba sa son sauka daga mulki.
Da farko ya yi alƙawarin mika mulki cikin shekaru huɗu, daga baya hakan ya koma shekaru takwas, sannan aka ɗage har zuwa babban zaɓen shekarar 1996, wanda aka gudanar ƙarƙashin sabon kundin tsarin mulki da ya kayyade shugaban ƙasa zuwa wa’adi biyu kacal.
Sai dai a shekarar 2005, majalisar dokokin Uganda ta soke dokar kayyade wa’adin shugaban ƙasa. Masu adawa sun ce an yi hakan ne domin bai wa Museveni damar ci gaba da mulki ba tare da iyaka ba.
Tun daga lokacin ya lashe dukkan zaɓukan shugaban ƙasa da ya tsaya takara. A wani lokaci ma, lokacin da aka buƙace shi ya yi ritaya, ya kwatanta mulkinsa da gonar ayaba da ya shuka, yana cewa ba zai iya barinta ba a lokacin da ta fara ba da amfanin da ake jira.
Yanzu Museveni yana da shekaru 81 a duniya, kuma ya sake tsayawa takarar wa’adi na bakwai a zaɓen shugaban ƙasa da aka gudanar a watan Janairun 2026, lamarin da ya ƙara tsawaita zamansa cikin shugabannin da suka fi daɗewa kan mulki a nahiyar Afirka.
Ga mafi yawan ‘yan Uganda da shekarunsu ba su kai 40 ba, Museveni shi kaɗai ne shugaban ƙasar da suka taɓa sani tun bayan haihuwarsu.
