Daga Wakiliya
Wani matashi ɗan shekara 23 mai suna Daniel Cressy ya zama mutum na farko a yankin Gulf Coast na Amurka da ya warke daga cutar sikila bayan samun maganin gyaran ƙwayoyin halitta (gene therapy).
Likitocin Asibitin Manning Family Children’s da ke birnin New Orleans sun bayyana cewa an yi wa Daniel wannan magani cikin nasara, lamarin da ya sa yanzu ba ya fama da alamomin cutar sikila.
An ɗauki kusan shekaru biyu ana gudanar da maganin. An cire wasu ƙwayoyin halitta daga jikinsa, aka gyara su ta amfani da fasahar CRISPR/Cas9, sannan aka mayar da su jikinsa domin su samar da lafiyayyun ƙwayoyin jini.
Daniel ya bayyana cewa burinsa shi ne ya zama matuƙin jirgin sama. A baya cutar sikila ta hana shi samun lasisin tuƙin jirgin sama, amma yanzu yana fatan cika wannan buri bayan warkewarsa.
Masana sun ce wannan nasara wata babbar alama ce da ke nuna cewa cutar sikila na iya samun cikakken magani ta hanyar sabuwar fasahar gyaran ƙwayoyin halitta, abin da ke ba marasa lafiya fatan rayuwa mai inganci a nan gaba.
