Daga Wakiliya
Babban Ministan Tsaro, Janar Christopher Gwabin Musa (Mai Ritaya), ya musanta jita-jitar da ke yawo a kafafen sada zumunta cewa yana shirin yin murabus daga mukaminsa.
A cikin wata sanarwa da ofishinsa ya fitar, an bayyana cewa rahotannin da ke cewa Janar Christopher Gwabin Musa zai sauka daga mukaminsa ƙarya ce tsagwaronta, wadda aka ƙirƙira domin yaudarar jama’a.
Sanarwar ta ce Babban Ministan Tsaron na ci gaba da gudanar da aikinsa ba tare da wata tangarda ba, kuma yana mai da hankali kan jagorantar manufofin tsaron ƙasa da kuma cika nauyin da aka ɗora masa.
Ofishin ya buƙaci jama’a su yi watsi da wannan jita-jita, tare da kira ga kafafen yaɗa labarai da masu amfani da kafafen sada zumunta su riƙa tantance sahihancin bayanai kafin yaɗa su.
