Abubuwa 6 da za ka iya sha kafin barci domin taimakawa wajen daidaita sikarin jini da rage haɗarin kamuwa da ciwon suga
Idan kana son kiyaye lafiyar ka da sikarin jininka ya tsaya daidai matsayi, abin da kake sha kafin kwanciya na iya taimakawa. Duk da haka, babu wani abin sha da zai magance matsalar sikari cikin dare ɗaya. Amma wasu abubuwan sha na iya taimakawa wajen rage sauyin sikarin jini da hana kamuwa da ciwon suga ta hanyar samar da ruwa, sinadarin furotin da kuma kauce wa abubuwan sha masu sukari.
- Madarar Soya (Soy Milk) mara sukari
Madarar soya mara sukari tana ɗauke da furotin da lafiyayyen kitse, sannan ba ta da yawan sukari. Wannan na iya taimakawa wajen rage saurin tashi ko saukar sikarin jini yayin barci.
- Abin sha mai furotin (Protein Shake)
Ƙaramin abin sha mai ɗauke da furotin kuma mara sukari sosai na iya taimakawa wajen rage jin yunwa da dare da kuma daidaita sikarin jini. A zaɓi wanda ke ɗauke da gram 15 zuwa 20 na furotin.
- Shayin Chamomile
Shayin Chamomile ya shahara wajen kwantar da hankali da taimakawa samun barci mai kyau. Wasu bincike sun nuna cewa yana iya taimakawa wajen rage sikarin jini da kuma inganta yadda jiki ke amfani da sinadarin insulin.
- Shayin Kirfa (Cinnamon Tea)
Wasu bincike sun nuna kirfa na iya taimakawa jiki ya fi amfani da insulin yadda ya kamata, duk da cewa ba duka binciken suka tabbatar da hakan ba. Duk da haka, shayin kirfa mara sukari na iya zama madadin abin sha mai lafiya kafin kwanciya.
- Madara
Ƙaramin kofi na madara mara kitse ko mai ƙarancin kitse na ɗauke da furotin, calcium da magnesium, waɗanda ke taimakawa aikin insulin. A guji madara mai ɗauke da ƙarin sukari.
- Ruwa
Shan isasshen ruwa na daga cikin mafi muhimmancin hanyoyin taimakawa wajen daidaita sikarin jini. Rashin ruwa a jiki na iya sa sikarin jini ya ƙaru. Za ka iya ƙara ɗan lemun tsami domin ɗanɗano ba tare da saka sukari ba.
Shawarwari
Ka tuna cewa waɗannan abubuwan sha ba magani ba ne. Don taimakawa wajen kula da sikarin jini:
• Ka riƙa shan isasshen ruwa.
• Ka yi barci na awa 7 zuwa 9 a kullum.
• Ka gama cin abinci awa 2 zuwa 3 kafin kwanciya idan zai yiwu.
• Idan yunwa ta taso da dare, ka zaɓi ɗan abin ci mai gina jiki maimakon kayan zaki ko abubuwan sha masu sukari.
Lura: Idan kana da ciwon suga ko wata matsalar lafiya, yana da kyau ka bi shawarar likita ko ƙwararren masanin abinci kafin ka canza tsarin abincinka.
