Gwajin DNA: 1 cikin 4 na mazan da aka yiwa Gwajin DNA a Najeriya ba su ne ubannin yaransu ba – Rahoto
Daga Wakiliya
Kusan mutum daya cikin maza hudu da aka yi wa gwajin DNA domin tabbatar da ubanci a Najeriya, an gano cewa ba su ne ubannin yaran da suke raina ba.
Wani rahoton kamfanin Smart DNA Nigeria ya ce kashi 23.6 cikin 100 na gwaje-gwajen DNA da aka yi a shekarar 2025/2026 sun nuna cewa mutanen da aka gwada ba su ne ubannin yaran ba.
Adadin ya ragu kadan daga kashi 24 cikin 100 a shekarar da ta gabata, da kuma kashi 26.1 cikin 100 a shekarar 2023.
Sai dai Smart DNA ta yi gargadin cewa wannan ba yana nufin cewa daya cikin maza hudu a Najeriya ba ubannin yaran da suke raina ba ne.
Kamfanin ya ce mutanen da suka je yin gwajin sun riga sun kasance da wasu dalilai ko shakku da suka sa suke son tabbatar da ubancin yaran.
Chukwudi Eze, Manajan Tallace-tallace na Smart DNA, ya ce ya kamata a kuma lura da cewa kashi uku cikin hudu na mazan da aka yi wa gwajin an tabbatar da cewa su ne ubannin yaran.
Mafi yawan gwaje-gwajen, wato kashi 87 cikin 100, mutane ne suka nema da kansu domin samun tabbaci kan dangantakar jini.
Rahoton ya ce maza masu shekaru 41 zuwa sama ne suka fi yawa cikin wadanda suka nemi gwajin, inda suka kai kashi 48 cikin 100.
Yara ‘yan kasa da shekaru biyar kuma sun kasance mafi yawan wadanda aka yi wa gwajin, inda suka kai kashi 59.5 cikin 100.
Lagos ce ta fi yawan gwaje-gwajen, inda ta kai kashi 75.1 cikin 100 na bayanan da aka tattara. Ogun ce ta biyo baya a jihohin da ke wajen Lagos.
Smart DNA ta ce ba za a iya amfani da sakamakon wajen tantance yawan yaran da ba ubanninsu na jini ba a Najeriya baki daya ba, saboda mutanen da aka yi wa gwajin ba su wakilci dukkan iyalan kasar ba.
Kamfanin ya kuma yi kira ga jama’a da su guji yada jita-jita ko amfani da wannan adadi wajen yin ikirarin cewa daya cikin maza hudu a Najeriya ba ubannin yaransu ba ne.
