APC ta bukaci a binciki Dino Melaye da wasu jiga-jigan PDP kan zargin alaka da Dan Damfarar Intanet Hushpuppi
Daga Wakiliya
Jam’iyyar APC ta bukaci hukumomin Najeriya su binciki tsohon Sanatan Kogi, Dino Melaye, da wasu manyan jami’an jam’iyyar PDP kan rahotannin da ke alakanta su da dan damfarar intanet, Hushpuppi.
Wata ‘yar jarida mai zaman kanta, Kemi Olunloyo, ce ta bayyana rahotannin da ke cewa wasu manyan ‘yan PDP, ciki har da tsohon Shugaban Majalisar Dattawa, Bukola Saraki, dan takarar PDP na shugaban kasa a 2019, Atiku Abubakar, da tsohon Kakakin Majalisar Wakilai, Yakubu Dogara, na da alaka da Hushpuppi.
A wata sanarwa da Mataimakin Sakataren Yada Labarai na Kasa na APC, Yekini Nabena, ya fitar a Abuja ranar Asabar, jam’iyyar ta bukaci Hukumar Yaki da Cin Hanci da Rashawa (EFCC), da Hukumar Leken Asiri kan Harkokin Kudi ta Najeriya (NFIU), da sauran hukumomi su gudanar da cikakken bincike.
APC ta ce ya kamata a binciki zarge-zargen da suka shafi safarar kudade da kuma alakarta wasu daga cikin manyan ‘yan PDP da Hushpuppi.
Hushpuppi dai an kama shi a Dubai, Hadaddiyar Daular Larabawa, sannan aka mika shi ga hukumomin Amurka domin fuskantar tuhume-tuhume da suka shafi damfarar intanet da sauran laifukan da suka shafi kudi.
Rahotannin da APC ta ambata sun ce laifukan da ake zargin Hushpuppi da aikatawa sun hada da damfara da kudaden da suka kai daruruwan biliyoyin naira.
