An cire wa wani mutum dutse mai nauyin kilogiram 3.1 daga mafitsararsa a Sri Lanka
Daga Wakiliya
Likitoci a wani asibiti a Sri Lanka sun yi nasarar cire wani babban dutse daga mafitsarar wani mutum mai shekaru 55, wanda nauyinsa ya kai kilogiram 3.1.
Likitocin Asibitin Trincomalee District General Hospital ne suka yi aikin tiyatar a makon da ya gabata, inda suka cire dutsen da suka ce girmansa ya yi kama da ƙwan jimina.
Rahotanni sun ce mutumin yana kwance a asibitin ne bayan ya kamu da shanyewar jiki, amma yayin da ake kula da shi, likitoci suka lura yana fama da matsalar yin fitsari.
Binciken da aka gudanar ya gano cewa yana ɗauke da wani babban dutse a cikin mafitsararsa, lamarin da ya sa aka tura shi ga ƙwararrun likitocin tiyatar mafitsara.
Likitan mafitsara da ya jagoranci aikin, Dokta Pragaladhan Balakrishnan, ya ce dutsen yana da nauyin da ya yi daidai da na jaririn da aka haifa, kuma girmansa ya kai kusan santimita 17.
Ya ce mutumin yana cikin ƙoshin lafiya bayan an cire dutsen, kuma yana ci gaba da samun kulawa a asibitin saboda sauran matsalar lafiyarsa.
Dokta Balakrishnan ya ce, bisa ga bayanan da suke da su, wannan na iya zama dutse mafi girma da aka taɓa rubutawa kuma aka cire wa mutum ta hanyar tiyata.
Daraktar asibitin, Sandamali Samarakoon, ta ce akwai yiwuwar lamarin ya cancanci shiga littafin tarihin duniya na Guinness a matsayin dutse mafi girma da aka cire daga mafitsara ta hanyar tiyata.
A shekarar 2003 ne aka taɓa cire wani dutse mai nauyin kilogiram 1.9 daga mafitsarar wani mutum a Brazil, wanda Guinness World Records ya bayyana a matsayin mafi girma da aka taɓa samu a wancan lokacin.
Dutsen da aka cire a Sri Lanka ya fi wannan nauyi da kilogiram 1.2.
Duwatsu a mafitsara na samuwa ne lokacin da fitsari ya dade yana zama a cikin mafitsara, lamarin da ke sa wasu sinadarai da ke cikinsa su taru su zama dutse.
Ƙananan duwatsu na iya fita da kansu, amma manya na iya toshe hanyar fitsari kuma su buƙaci magani ko tiyata.
