Kocin Masar ya suma yayin da yake ƙoƙarin raba faɗa tsakanin matansa, daga bisani ya saki uwargidarsa
Daga Wakiliya
Kocin ƙungiyar ƙwallon ƙafa ta Masar, Hossam Hassan, ya suma yayin da yake ƙoƙarin raba faɗa tsakanin matansa biyu a wani otal da ke yankin North Coast na ƙasar.
Rahotanni sun ce Hossam Hassan ya kai matansa, Howaida Al-Gharbawi da Dina Mustafa, wadda aka fi sani da Dan Adam, domin yawon shakatawa a yankin.
Sai dai yayin da suke wani gidan shakatawa da ke cikin otal ɗin Porto Marina a ranar Juma’a da yamma, matan biyu sun samu saɓani wanda daga bisani ya rikide zuwa faɗa.
Shaidu sun ce faɗan ya ƙunshi naushi, jan gashi da kuma jifan juna da abubuwa.
Hossam Hassan, mai shekara 60, ya yi ƙoƙarin shiga tsakani domin dakatar da faɗan, amma ya suma a yayin da ake rikicin.
Ma’aikatan otal da ’yan sanda sun isa wurin, inda suka raba matan biyu. Rahotanni sun ce dukkansu sun samu raunuka da raunukan yanka.
Howaida ta shigar da ƙara ga ’yan sanda kan lamarin, amma daga bisani ta janye ƙarar.
Bayan faruwar lamarin, bidiyon faɗan ya bazu sosai a kafafen sada zumunta, yayin da kowace ɓangare ta bayar da nata bayanin kan abin da ya jawo rikicin.
Sai dai daga bisani, Hossam Hassan ya raba aurensa da Howaida Al-Gharbawi, wadda ita ce uwargidarsa.
Lauyan Dina Mustafa, Mohamed Shams, ne ya tabbatar da rabuwar auren, yana mai cewa rikicin ya kai ga matakin da ba za a iya sulhunta ɓangarorin ba.
Hossam Hassan ya auri Howaida a tsakiyar shekarun 1990, kuma suna da ’ya’ya tare. Sun taɓa rabuwa na ɗan lokaci a shekarar 2022 kafin daga bisani su sasanta.
Daga baya Hassan ya auri Dina Mustafa a shekarar 2015.
Lauyan Hassan ya kuma musanta rahotannin da ke cewa kocin ya fuskanci matsalar lafiya mai tsanani, yana mai cewa yana cikin ƙoshin lafiya.
Hossam Hassan, tsohon ɗan wasan tawagar ƙasar Masar ne kuma wanda ya fi kowa cin ƙwallaye a tarihin ƙasar. Ya fara horar da tawagar ƙasar a shekarar 2024.
