TURKASHI: An kama ɗa da tsohuwar matar mahaifinsa kan zargin shirya kashe shi a Kano
Daga Wakiliya
An kama wani ɗan Alhaji Usman Shanono da tsohuwar matar mahaifinsa a Kano bisa zargin shirya kashe shi a unguwar Dantsinke.
Rahotanni sun ce ɗan Alhaji Shanono da tsohuwar matarsa sun ɗauki wani mutum haya tare da ba shi N500,000 domin ya kashe shi.
Sai dai mutumin da aka ɗauka aikin ya sanar da Alhaji Shanono game da shirin, inda suka haɗa baki suka shirya dabarar yin kamar an kashe shi.
An ce mutumin ya kai wa waɗanda suka ɗauke shi aikin agogon Alhaji Shanono da wasu kayayyakin sa, domin ya tabbatar musu cewa ya kammala aikin.
Daga bisani aka fara sanar da mutuwar Alhaji Shanono, har aka fara shirya jana’izarsa tare da tattara masu makoki. Ɗansa da tsohuwar matarsa ma sun halarci wajen jana’izar domin nuna alhini.
Sai dai abin mamaki ya faru lokacin da Alhaji Shanono ya bayyana da ransa tare da jami’an tsaro, lamarin da ya kai ga kama ɗansa da tsohuwar matarsa.
A yanzu haka, mutanen biyu na fuskantar shari’a kan zargin hannu a yunkurin kashe Alhaji Usman Shanono.
An ruwaito lamarin ne a shirin In Da Ranka na Freedom Radio Kano.
Lamarin ya jawo ce-ce-ku-ce, musamman kan yadda ake zargin ɗan mutum da tsohuwar matarsa da hannu a wani shiri na kashe shi.
Me ke jawo irin wannan abu, kuma me ya kamata a yi?
