‘Yan sanda sun kama manajan makabarta da mai haƙa kabari kan zargin tono gawar mamaci domin satar akwatin gawa da nufin sayarwa a Akwa Ibom
Daga Wakiliya
‘Yan sandan Jihar Akwa Ibom sun ce sun kama manajan wata makabarta da wani mai haƙa kabari bisa zargin tono gawar wani da aka binne kwanan nan domin satar akwatin gawarsa da nufin sayarwa.
Mai magana da yawun rundunar ‘yan sandan jihar, Timfon John, ta ce lamarin ya faru ne a daren ranar 3 ga Agustan 2026 da misalin ƙarfe 11:30 na dare a Makabartar Mbiokporo da ke ƙaramar hukumar Nsit-Ibom.
A cewarta, wani jami'in ƙungiyar sintiri ta sa-kai ne ya hango wasu maza biyu suna ɗauke da akwatin gawa a kan babur marar rajista, lamarin da ya sa ya tare su.
‘Yan sanda sun ce ɗaya daga cikin waɗanda ake zargin, Effiong Asuquo, ya tsere, yayin da aka kama Nsikak Effiong tare da miƙa shi ga jami'an tsaro.
Bayan gudanar da bincike, ‘yan sanda sun ce Nsikak Effiong ya amsa cewa shi da abokin aikinsa sun tono sabuwar kabari, suka fitar da gawar daga cikin akwatin sannan suka sace akwatin domin sayar da shi saboda neman kuɗi.
Rundunar ta ce ta kwato akwatin gawar da kuma babur ɗin da ake zargin an yi amfani da shi wajen aikata laifin.
Binciken da aka ci gaba da yi ya kai ga kama manajan makabartar, Elijah Matthew Edet, a ranar 5 ga Agusta. A cewar ‘yan sanda, ya amsa cewa ya haɗa baki da masu haƙa kabarin, yana mai cewa wannan ne karo na farko da ya shiga irin wannan aiki.
Kwamishinan ‘yan sandan jihar, Baba Azare, ya yi Allah wadai da abin da ya bayyana a matsayin mummunan aiki na rashin mutunta mamata da kuma cin zarafin mutuncinsu. Ya kuma ba da umarnin ci gaba da bincike domin kamo duk wanda ke da hannu a lamarin, tare da yaba wa jami'an sintiri ta sa-kai saboda taka-tsantsan da suka yi.
