Matasa ‘Yan Gen Z Sun Jawo Masana’antar Barasa Ta Yi Asarar Dala Biliyan 830 Cikin Shekaru Huɗu
Daga Wakiliya
Masana’antar barasa ta duniya ta yi asarar kimanin dala biliyan 830 cikin shekaru huɗu da suka gabata, sakamakon raguwar shan barasa musamman a tsakanin matasan zamani da ake kira Generation Z (Gen Z).
Rahotanni sun nuna cewa wannan koma baya ya fi girman tasirin rikicin tattalin arzikin duniya na shekarar 2008 har sau huɗu, abin da masana ke cewa alama ce ta sauyin ɗabi’ar masu amfani da kayayyakin barasa, ba wai matsala ta wucin gadi ba.
Kamfanonin barasa mafi girma a duniya, ciki har da Diageo, Pernod Ricard da Rémy Cointreau, sun fuskanci faɗuwar darajar hannayen jarinsu zuwa mafi ƙanƙanta cikin kusan shekara goma.
A Amurka kuwa, yawan masu shan barasa ya sauka zuwa mafi ƙanƙanta tun bayan fara tattara irin waɗannan bayanai a shekarar 1939. Yanzu kashi 54% kacal na manyan Amurkawa ne suka ce suna shan barasa, yayin da mafi yawan jama’a ke ganin ko shan kaɗan na iya zama illa ga lafiya, musamman bayan rahotannin da suka danganta barasa da wasu nau’ikan cutar daji.
Saboda wannan sauyi, manyan kamfanonin barasa sun fara karkata zuwa kasuwar abubuwan sha marasa barasa, inda suke zuba jari ko sayen kamfanonin da ke ƙera irin waɗannan kayayyaki domin dacewa da sabuwar buƙatar masu amfani da ke fifita lafiya da walwala fiye da shan barasa.
