Kungiyar Kwallon Kafa ta Turai (UEFA) Ta Bukaci Shugaban FIFA, Gianni Infantino Ya Yi Murabus
Daga Wakiliya
Ƙungiyar ƙwallon ƙafa ta Turai (UEFA) ta bayyana cewa ta rasa amincewa da shugaban FIFA, Gianni Infantino, tare da buƙatar ya yi murabus daga muƙaminsa bayan rikicin yunƙurin sayar da wani kaso na haƙƙin kasuwancin gasar cin Kofin Duniya.
Rahotanni sun ce Gianni Infantino ya yi ƙoƙarin sayar da kaso mai darajar fam biliyan 3.1 na kasuwancin gasar ga wasu masu zuba jari masu zaman kansu da Josh Kushner ke jagoranta. Sai dai shirin ya rushe bayan ya fuskanci suka masu yawa, lamarin da ya sa shugaban FIFA ya janye daga matakin.
A cikin wata sanarwa da ta fitar, UEFA ta zargi shugabancin FIFA da gudanar da shirye-shirye cikin sirri ba tare da cikakken bayani ko tuntuba ba, tana mai cewa hakan ya janyo rashin amincewa daga ƙungiyoyin ƙwallon ƙafa da dama.
UEFA ta ce za ta yi aiki tare da ƙungiyoyin mambobinta da sauran ƙungiyoyin nahiyoyi domin binciken yadda lamarin ya faru da kuma samar da matakan da za su hana maimaituwarsa. Ta kuma jaddada cewa babu wani zaɓi da ya kamata a cire daga tebur wajen ɗaukar matakin gyara.
Rahotanni sun nuna cewa ƙasashe mambobin FIFA na iya fara shirin ƙuri’ar rashin amincewa da Gianni Infantino domin cire shi daga shugabancin ƙungiyar. Ana buƙatar aƙalla ƙungiyoyin ƙwallon ƙafa 46 daga cikin mambobin FIFA su goyi bayan wannan mataki, yayin da UEFA ita kaɗai ke da mambobi 55.
— Wakiliya
