Lokacin shan wutar kyauta ya ƙare: Gwamnati za ta fara karɓar kuɗin wutar lantarki daga jami’o’i da asibitoci – Ministan Wuta
Daga Wakiliya
Gwamnatin Tarayya ta ce za ta fara karɓar kuɗin wutar lantarki daga jami’o’i da asibitocin koyarwa da ke amfani da cibiyoyin samar da wutar lantarki daga hasken rana da ta girka a wuraren.
Ministan Lantarki, Joseph Tegbe, ne ya bayyana hakan a Abuja yayin ƙaddamar da kamfanin kula da kadarorin makamashi mai sabuntawa na gwamnati, RAMCO.
Ministan ya ce za a sanya sabon tsarin biyan kuɗin wutar lantarki ne domin samun kuɗin kula da waɗannan kadarori da kuma tabbatar da cewa suna ci gaba da aiki.
Ya ce gwamnati ta yi nasarar gina cibiyoyi da dama, amma sau da yawa tana fuskantar matsala wajen kula da su bayan kammala su.
“Wasu jami’o’i sun zo wurina domin su gode min bayan sun shafe shekara biyu suna amfani da wutar lantarki kyauta. Na ce musu, mun gode, amma lokacin kyautar ya ƙare. Yanzu za mu zo mu ƙaddamar da tsarin, kuma za ku biya kuɗin wutar lantarki,” in ji shi.
Ya ƙara da cewa irin wannan tsarin zai shafi asibitocin koyarwa da su ma ke cin gajiyar wutar lantarkin da gwamnati ta samar.
Tun daga shekarar 2017, Hukumar Samar da Wutar Lantarki a Karkara, REA, ta ce gwamnatin tarayya ta samar da megawatt 82 na wutar lantarki daga tsarin hasken rana da aka haɗa da sauran hanyoyin samar da wuta a jami’o’in gwamnatin tarayya 22 da asibitocin koyarwa uku.
Manajan Daraktan REA, Abba Aliyu, ya ce ya zama dole cibiyoyin da ke cin gajiyar waɗannan ayyuka su bayar da gudunmawa wajen kula da su ta hanyar biyan kuɗin wutar da suke amfani da ita.
Ya ce gwamnati ce ta samar da kuɗin gina kadarorin, don haka cibiyoyin da ke amfana da su ya kamata su taimaka wajen tabbatar da dorewarsu.
Daga cikin jami’o’in da ke cin gajiyar shirin akwai Jami’ar Ahmadu Bello da ke Zariya, Jami’ar Najeriya da ke Nsukka da kuma Jami’ar Tarayya da ke Wukari a jihar Taraba.
Ministan Ilimi, Maruf Tunji Alausa, da Ministan Ƙananan Ma’aikatar Lafiya, Iziaq Adekunle Salako, na daga cikin manyan jami’an da suka halarci taron.
