Amurka Ta Gargadi ‘Yan Najeriya Kan Amfani da Hotunan Fasfo da AI Ta Gyara wajen Fasfo Ko Neman Biza
Daga Wakiliya
Ofishin Jakadancin Amurka da ke Najeriya ya gargadi masu neman biza da fasfo da su guji amfani da hotunan da aka gyara da fasahar Artificial Intelligence (AI) ko wasu kayan aikin gyaran hoto, yana mai cewa ba za a karɓi irin waɗannan hotuna ba.
A cikin wata sanarwa da ofishin ya wallafa a shafinsa na X ranar Juma’a, ya bayyana cewa dole ne hoton fasfo ya kasance na gaskiya, na kwanan nan, kuma ya yi daidai da kamannin mai nema a halin yanzu.
Sanarwar ta ce kada masu neman biza ko fasfo su yi amfani da AI, filtoci (filters), ko wani nau’in gyaran hoto na dijital yayin ɗaukar hoton fasfo.
Ofishin ya kuma jaddada cewa hoton dole ne ya kasance an ɗauke shi cikin watanni shida da suka gabata, domin jami’an tsaron kan iyaka da na filayen jiragen saman Amurka su iya gane mai hoton cikin sauƙi.
Haka kuma, ya yi gargadin cewa amfani da hoton da aka gyara ta hanyar dijital zai iya jinkirta aikin duba da amincewa da buƙatar fasfo ko biza.
Ofishin ya shawarci masu neman takardun tafiya zuwa Amurka su bi ƙa’idojin ɗaukar hoton fasfo da Ma’aikatar Harkokin Wajen Amurka ta tanada domin kauce wa matsaloli yayin gudanar da aikace-aikacensu.
