Daga Wakiliya
Rundunar Sojin Ruwa ta Najeriya (Navy), ta hannun NNS BEECROFT, tare da hadin gwiwar Hukumar Kwastam ta Najeriya (NCS), sun kama kwale-kwale hudu dauke da buhunan shinkafa 518 da ake zargin an shigo da su kasar ba bisa ka’ida ba a hanyoyin ruwa na Badagry.
Kwamandan NNS BEECROFT, Commodore Aiwuyor Adams-Aliu, ya ce an gudanar da samamen ne a ranar 31 ga Yuli, bayan samun bayanan sirri daga Western Regional Control Centre (FALCON EYE), lamarin da ya sa aka tura jami’an rundunar zuwa wani shingen binciken Kwastam.
Ya bayyana cewa hedikwatar Western Naval Command ta jagoranci aikin tare da hadin gwiwar Western Marine Command na Hukumar Kwastam, yayin da aka kuma tura jami’an ruwa domin kara karfafa aikin.
A cewarsa, wannan samame na daga cikin kokarin Babban Hafsan Sojin Ruwa na Najeriya, Vice Admiral Idi Abbas, na amfani da fasaha da inganta ayyukan tsaro domin dakile masu aikata laifuffuka a yankunan ruwan Najeriya.
Har ila yau, ya ce Flag Officer Commanding na Western Naval Command, Rear Admiral Abubakar Mustapha, ya umarci ci gaba da gudanar da ayyukan leken asiri da kuma kara hadin gwiwa tsakanin hukumomin tsaro domin yaki da safarar kayayyaki ba bisa ka’ida ba da sauran laifuffukan teku.
Rundunar Sojin Ruwan ta tabbatar da cewa za ta ci gaba da hada kai da sauran hukumomin tsaro wajen yaki da fasa-kauri da sauran ayyukan haramtattu a yankunan ruwan kasar.
Sai dai sanarwar ba ta bayyana kama wani da ake zargi da hannu a safarar shinkafar ba.
