Sama da masana magunguna 9,500 suk bar Najeriya cikin shekaru biyu saboda ƙarancin albashi da kuma rashin kyawun yanayin aiki -ACPN
Daga Wakiliya
Ƙungiyar Masu Magunguna ta Najeriya (ACPN) ta ce sama da masana magunguna 9,500 sun bar ƙasar cikin shekaru biyu da suka gabata saboda ƙarancin albashi da kuma rashin kyawun yanayin aiki.
Ƙungiyar ta bayyana hakan ne a cikin wata sanarwa da ta fitar bayan taronta na shekara-shekara karo na 45 da aka gudanar a Abuja.
ACPN ta ce “tsarin biyan albashi mara kyau”, yanayin aikin da bai gamsar ba, da kuma matsalolin rabon magunguna na daga cikin abubuwan da ke tilasta ƙwararrun ma’aikatan lafiya yin ƙaura zuwa wasu ƙasashe.
Ƙungiyar ta yi gargadin cewa ci gaba da ficewar ƙwararrun malaman magunguna na iya yin illa ga ilimin koyar da aikin pharmacy da kuma samar da ingantaccen kiwon lafiya a Najeriya.
Ta kuma bukaci gwamnatin tarayya ta haɗa kantunan magunguna na al'umma cikin tsarin kiwon lafiya na matakin farko, domin su taimaka wajen samar da magunguna masu araha da kuma kula da ƙananan cututtuka.
ACPN ta ce hakan zai rage cunkoso a asibitocin matakin sakandare da na ƙwarewa.
Ƙungiyar ta kuma yi kira da a ƙara samar da ayyukan duba lafiya a kantunan magunguna, kamar auna hawan jini da sukarin jini, ba da shawarwari kan amfani da magunguna da kuma wayar da kai kan lafiya.
A kan matsalar shaye-shayen ƙwayoyi, ACPN ta bukaci gwamnati ta ƙara tsaurara matakan gurfanar da masu safarar ƙwayoyi da masu sayar da magungunan da aka kayyade ba tare da lasisi ba.
Ta kuma bukaci Majalisar Kula da Aikin Pharmacy (PCN), NAFDAC, NDLEA da ‘yan sanda su ƙarfafa sa ido da aiwatar da dokokin da suka shafi magunguna.
ACPN ta ce akwai kuma buƙatar gyara cibiyoyin kula da masu fama da matsalar shaye-shayen ƙwayoyi da kuma ƙara samar da wasu cibiyoyi a sassan ƙasar.
Haka kuma, ƙungiyar ta yi kira ga Majalisar Dokokin Najeriya da ta kammala dokokin da suka shafi ɓangaren magunguna, ciki har da gyaran dokar Fake Drug Act.
Ta kuma ba da shawarar kafa wata hukuma ta tarayya da za ta kula da harkokin magunguna, musamman wajen daidaita saye da rarraba magunguna.
ACPN ta ce ya kamata a kafa Kwalejin Kwararrun Masana Magunguna ta Ƙasa domin inganta ƙarin ƙwarewa da ci gaba da koyar da fannin pharmacy a Najeriya.
