Gumi ya gargadi Sheikh Jingir, amma ya ce a yi wa malamin uzuri: “Ya taso ne a Plateau, jihar da ake tsananin nuna ƙiyayya ga Musulunci”
Daga Wakiliya
Malamin addinin Musulunci da ke Kaduna, Dr Ahmad Gumi, ya yi kira ga Sheikh Sani Yahaya Jingir da ya guji shigar da addini cikin siyasar jam’iyyu.
Dr Ahmad Gumi ya bayyana hakan ne a wani rubutu da ya wallafa a Facebook ranar Litinin, bayan Sheikh Sani Yahaya Jingir ya kare tsarin tikitin Musulmi da Musulmi na jam’iyyar APC, tare da kira ga Musulmi da su zaɓi Shugaba Bola Ahmed Tinubu saboda ya zaɓi Musulmi a matsayin mataimakinsa.
Sheikh Sani Yahaya Jingir ya yi wannan magana ne a wani taron bikin auren gata da aka gudanar a Kano ranar Asabar.
Sai dai Dr Ahmad Gumi ya ce a ƙasar da ke da addinai daban-daban, bai kamata a jawo addini cikin siyasar da ke cike da rikici ba.
“A cikin ƙasa mai addinai da dama, bai kamata a jawo addini cikin rikitaccen siyasar da ke cike da kazanta ba,” in ji Dr Ahmad Gumi.
Ya kuma ce ya kamata a yi wa Sheikh Sani Yahaya Jingir uzuri saboda matsanancin ra’ayinsa, yana mai cewa malamin ya taso a jihar Plateau inda suke fuskantar abin da ya kira “tsananin nuna ƙiyayya ga Musulunci”.
Dr Ahmad Gumi ya ƙara da cewa ko ɓangaren adawa ma bai kamata su rika amfani da addini ba wajen harkokin siyasa inda ya wallafa bidiyon Peter Obi dan takarar Jam'iyyar NDC da aka nuna shi yana kalaman addinanci a coci.
